• الرئيسية
• بقلم آدم وحوا

في كل مستشفى جناح يبدو صامتًا من الخارج لكنه يحمل داخله ضجيجًا لا يسمعه أحد
غرف يختلط فيها صوت الأجهزة بنبض الخوف وهمس الدعاء
أسِرة بيضاء يرقد فوقها أبطال مجهولون يخوضون معركة شرسة لا يُعلنونها
وهناك تحديدًا تبدأ الحكاية
حكاية مرض اسمه السرطان
وحكاية أمل اسمه الإنسان

في ركن من أركان هذا العالم الرمادي قرر شاب لم يتجاوز الثامنة والعشرين أن يكون النور
دكتور زياد حسين الأمين
اختار أن يتخصص في طب الأورام لا بحثًا عن لقب ولا شهرة ولا مال
بل لأنه رأى أن مريض السرطان لا يحتاج فقط طبيبًا يعالج الجسد
بل إنسانًا يعالج الخوف
يسند الروح
ويهمس في الأذن في اللحظة التي ينهار فيها كل شيء ويقول
أنا معاك
مش هسيبك
أنت مش لوحدك
ما كانش بيشوف المرضى كحالات
كان بيشوفهم كقصص
كناس ليهم حياة وأحلام وأولاد وأوقات حلوه
كان شايف فيهم بشر محتاجين أمل قبل أي علاج
ومع الوقت بدأ يفكر
إزاي نقدر نقف جنب الناس دي فعلًا
مش بس في العياده
ولا وقت الجرعه
لكن في كل خطوه من خطوات الرحلة الصعبة
ومن هنا بدأت فكرة
تحولت لحلم
وبعدين لحقيقه
حقيقه اسمها Doc Ontime
مش مجرد اسم
ولا صفحه على السوشيال ميديا
ولا مشروع إلكتروني
لكن بيت
بيت كبير بيرحب بكل حد مر بتجربة السرطان
مريض
متعافي
مرافق
حتى اللي خايف يكون مريض
البيت ده اتبنى على أكتاف ناس وجعهم خلّاهم أقوى
أشخاص قرروا يردوا الجميل مش بالكلام
لكن بالفعل
مها العزبي
إيمان الليثي
هديل
محاربات عدّوا الطريق بكل ما فيه
الشعر اللي وقع
الليل اللي مفيهوش نوم
الكيماوي
الضعف
الدموع
الأسئله اللي مبتخلصش
رجعوا بإرادتهم
مش علشان يتكلموا عن نفسهم
لكن علشان يقولوا لكل واحد لسه في النص
إحنا كنا مكانك
وعدّينا
وإنت كمان هتعدي
وإيدهم اللي كانت بتترعش زمان بقت دلوقتي بتسند غيرها
Doc Ontime بقت أكتر من منصه
بقت عيله
وبقت رساله

رسالة بتقول
السرطان بيأثر على عيله كامله
وإحنا هنا بنديك سلاح المواجهه
مش بس بالعلاج
لكن بالمعلومه
وبالكلمه
وبالدعم
وبإنك تلاقي حد فاهمك
وسامعك
ومش بيحكم عليك

ومن أول فيديو اتنشر
الناس شافت الحقيقه
شافوا وشوش حقيقيه
وحكايات من القلب
شافوا ناس زيهم
مش ممثلين
ولا نجوم
شافوا دموع
وشافوا ابتسامه طالعه من جوا الجرح
والفيديو يوصل لأكتر من 4 مليون مشاهده
مش علشان المونتاج
ولا الإعلانات
لكن علشان الصدق

والناس صدقت
لأن الأمل ليه مفعول السحر
لأن كل واحد عنده حد في حياته في نفس الطريق
أب
أم
أخت
صديق
ولأن كلنا بنخاف نسأل
وبنتردد نحكي
وبنخبي الحقيقة على اللي بنحبهم
بس في اللحظه اللي كل حاجةده فيها بتتوه
في حد بيظهر
زي دكتور زياد
ويقول بكل بساطه
اسأل
خاف
ابكي
بس ما تستسلمش

ومكانش كفايه نطبطب ونسمع
كان لازم نعلّم كمان
نعلّم المرافقين إزاي يتعاملوا
إزاي يغيروا قسطره
إزاي يلاحظوا الأعراض
إزاي يتعاملوا مع القيء والتعب والخوف
إزاي يطمنوا من غير ما يكدبوا
إزاي يبقوا عون مش عبء
إزاي يقفوا جنب المريض مش بس في المستشفى
لكن كمان في البيت
وفي لحظات الليل اللي بتيجي بصمت وبتوجع

كان لازم كمان نأهل الناس نفسيًا
نفهمهم إيه اللي هيحصل في الإشعاع
ونكسر رهبة الأجهزه اللي شكلها يخض
ونقول لهم
إنت أقوى من كل ده
وهتعدي
وأكيد هتعدي

الفريق بقى بيشتغل على الأرض
بيعمل ورش
وبيزور مستشفيات
وبيجهز نفسه لمؤسسه رسميه
علشان يبقى عنده كيان معترف بيه
ويدعّم المستشفيات
ويوفر أجهزه
ويعمل مؤتمرات
يحضرها أطباء ومتخصصين
ويعرضوا فيها كل جديد
مش بس في العلاج
لكن في الدعم النفسي والمعنوي

ولأن اللي اتعافى مش لازم ينسى
كان في دعوه صريحه
لكل محارب سابق
ممكن تكون مش قادر ترجع المستشفى
ممكن ريحتها تفكرك بالكيماوي
ممكن سريرها يرجعلك الذكريات
بس افتكر
في حد هناك دلوقتي
بيعيش نفس اللي إنت عشته
وبيحتاج يسمع كلمه منك
كلمه واحده
ممكن تبقى السبب في نجاته

في عالم بيتغير كل يوم
وفي وقت بقى فيه الأمل عمله نادره
في ناس لسه بتصدق في الخير
وبتعيشه
وبتنقله

ناس زي الدكتور زياد
وزي مها
وإيمان
وهديل
ناس الوجع خلاهم بشر أكتر
ورجعوا من المعركة أقوى
وأحن
وأصدق

إنت كمان ممكن تكون جزء من ده
مش لازم تبقى طبيب
ولا خبير
بس تقدر تقول كلمة
تزور
تدعي
تسمع
تشيل الخوف عن قلب مريض
وتديله أمل يعيش بيه

Doc Ontime مش حكاية بدأت وخلاص
دي لسه بتتكتب
وفي كل مره حد بيتعافى
ويرجع يسند غيره
بنكتب فصل جديد

علشان كده
لو شفت حد بيحارب السرطان
ما تبعدش
قرب
يمكن تكون إنت النور اللي كان مستنيه
ويمكن بكلمه واحده منك
تغير مصيره

في زمن بيزيد فيه الوجع
لسه في ناس بتختار تبقى حياه .